NamNgiep1 Logo

ພະນະທ່ານນາຍົກລາວ ພ້ອມຄະນະລົງຢ້ຽມຢາມໂຄງການເຂື່ອນໄຟຟ້ານໍ້າງຽບ 1

ພະນະທ່ານ ປອ. ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ແລະ ຄະນະໄດ້ລົງຢ້ຽມຢາມໂຄງການເຂື່ອນໄຟຟ້ານໍ້າງຽບ 1 ໃນວັນທີ 1 ກຸມພາ 2017 ເພື່ອເບິ່ງຄວາມຄືບໜ້າຂອງການກໍ່ສ້າງ, ວຽກງານດ້ານສິ່ງແວດລ້ອມ ແລະ ວຽກງານພັດທະນາສັງຄົມຂອງໂຄງການ.

ການຢ້ຽມຢາມໄດ້ຈັດຂຶ້ນທີ່ໂຄງການເຂື່ອນໄຟຟ້ານໍ້າງຽບ 1 ທີ່ບ້ານຫາດຢື້ນ, ເມືອງບໍລິຄັນ, ແຂວງບໍລິຄຳໄຊ ແລະ ໄດ້ໃຫ້ກຽດເຂົ້າຮ່ວມໂດຍ ພະນະທ່ານລັດຖະມົນຕີ, ຮອງລັດຖະມົນຕີຈາກກະຊວງທີ່ກ່ຽວຂ້ອງ ພ້ອມທັງພະນັກງານລັດການນຳຂັ້ນສູງຈາກຂັັ້ນສູນກາງ ແລະ ຂັ້ນແຂວງ ແລະ ຕົວແທນຈາກຜູ້ຖືຮຸ້ນ ຂອງໂຄງການ ພ້ອມທັງອຳນາດການປົກຄອງທ້ອງຖິ່ນ ແລະ ພໍ່ແມ່ປະຊາຊົນ.

ທ່ານ ໂຢຊິຮິໂຣ ຢາມາບາຢາຊິ (Yoshihiro Yamabayashi)  ຜູ້ອໍານວຍການຂອງບໍລິສັດໄຟຟ້ານໍ້າງຽບ 1 ຈໍຳກັດ ກ່າວໃນ ໄລຍະການຢ້ຽມຢາມວ່າ: ທ່ານຮູ້ສຶກເປັນກຽດຢ່າງສູງທີ່ໄດ້ຕ້ອນຮັບພະນະທ່ານນາຍົກ ແລະ ຄະນະສູ່ໂຄງການເຂືື່ອນໄຟຟ້ານໍ້າງຽບ 1 ແລະ ສະແດງຄວາມຮູ້ບຸນຄຸນຢ່າງສູງທີ່ພະນະທ່ານໄດ້ເສຍສະລະເວລາມາຢ້ຽມຢາມໂຄງການ ພ້ອມທັງລາຍງານຄວາມຄືບໜ້າຂອງໂຄງການໃຫ້ຄະນະໄດ້ຮັບຊາບ.

ໂຄງການໄຟຟ້ານ້ຳງຽບ 1 ແມ່ນໂຄງການເຂື່ອນໄຟຟ້າຂະໜາດ 290 ເມກາວັດ ທີ່ພວມດຳເນີນການກໍ່ສ້າງຢູ່ແຂວງ ບໍລິຄຳໄຊ ແລະ ແຂວງ ໄຊສົມບູນ ສປປ ລາວ ໂດຍປະກອບມີການກໍ່ສ້າງເຂື່ອນສອງເຂື່ອນ ແລະ ເຮືອນຈັກຜະລິດໄຟຟ້າສອງເຮືອນທີ່ນໍ້າງຽບ ແຂວງບໍລິຄຳໄຊ.

ການກໍ່ສ້າງໂຄງການໄດ້ເລີ່ມຕົ້ນຂຶ້ນໃນທ້າຍປີ 2014 ແລະ ມາຮອດທ້າຍປີ 2016 ກໍມີຄວາມຄືບໜ້າປະມານ 60.30 ສ່ວນຮ້ອຍ ແລະ ຄາດວ່າໃນທ້າຍປີ 2017 ການກໍ່ສ້າງໂຄງການຈະສຳເລັດປະມານ 90 ສ່ວນຮ້ອຍ.

ປະມານ 520 ຄົວເຮືອນຈາກບ້ານຫາດຊາຍຄຳ ເມືອງ ບໍລິຄັນ, ແຂວງ ບໍລິຄໍາໄຊ ແລະ ສີ່ບ້ານທີ່ ເມືອງ ຮົ່ມ ແຂວງ ໄຊສົມບູນ ຈະໄດ້ຍົກຍ້າຍເພື່ອການກໍ່ສ້າງເຂື່ອນ. ໃນທ້າຍເດືອນພະຈິກ 2016 ການຍົກຍ້າຍປະຊາຊົນບ້ານຫາດຊາຍຄຳກໍໄດ້ສຳເລັດເປັນທີ່ຮຽບຮ້ອຍແລ້ວ ແລະ ການຍົກຍ້າຍຄົວເຮືອນທີ່ເຫຼືອຈາກເມືອງຮົ່ມ ຄາດວ່າຈະສຳເລັດໃນທ້າຍເດືອນມິຖຸນາ 2017.

ໃນໄລຍະການຢ້ຽມຢາມ ພະນະທ່ານນາຍົກໄດ້ໄປຢ້ຽມຊົມເຂື່ອນໃຫຍ່ ແລະ ເຮືອນຈັກໄຟຟ້າທີ່ພວມຢູ່ໃນການກໍ່ສ້າງ, ເຮືອນທີ່ເຂດຍົກຍ້າຍຈັດສັນຫ້ວຍສູບຂອງໂຄງການ ຊຶ່ງເຂດດັ່ງກ່າວແມ່ນຕັ້ງຢູ່ເມືອງບໍລິຄັນ ແລະ ຕິດກັບເຂື່ອນດັດສົມນໍ້າຂອງໂຄງການເຂື່ອນ ໄຟຟ້ານໍ້າງຽບ 1 ໂດຍມີເນື້ອທີ່ປະມານ 6.100 ເຮັກຕາ ຈັດສັນໄວ້ເພື່ອຮອງຮັບປະຊາຊົນຜູ້ທີ່ຖືກຜົນກະທົບຈາກໂຄງການ. ໃນທ້າຍເດືອນມັງກອນ 2017 ກໍມີອີກ 62 ຄົວເຮືອນ ຢູ່ເມືອງຮົ່ມ ໄດ້ຕັດສິນໃຈຍົກຍ້າຍມາເຂດນີ້ ສຳລັບຄົວເຮືອນທີ່ເຫຼືອ ຈຳນວນໜຶ່ງກໍໄດ້ເລືອກເອົາຄ່າຊົດເຊີຍທັງໝົດ ແລະ ສະໝັກໃຈຍົກຍ້າຍໄປບ່ອນອື່ນ, ສ່ວນທີ່ເຫຼືອຈະຕັດສິນໃຈວ່າຈະຍົກຍ້າຍໄປບ່ອນໃດໃນບໍ່ດົນນີ້.

ໂຄງການແມ່ນຢູ່ພາຍໃຕ້ການຄວບຄຸມການກໍ່ສ້າງ ແລະ ດຳເນີນງານຂອງບໍລິສັດໄຟຟ້ານໍ້າງຽບ 1 ຊຶ່ງປະກອບມີສາມຂາຮຸ້ນຄື: ບໍລິສັດ ຄັນໄຊການໄຟຟ້າແຫ່ງປະເທດຍີ່ປຸ່ນ (Kansai Electric Power), ບໍລິສັດການໄຟຟ້າຝ່າຍຜະລິດສາກົນແຫ່ງປະເທດໄທຈຳກັດ (EGATi), ແລະ ລັດວິສາຫະກິດຖືຮຸ້ນລາວ (LHSE).

ໃນວັນທີ 2 ກຸມພາ 2017 ໂຄງການເຂື່ອນໄຟຟ້ານໍ້າງຽບ 1 ກໍໄດ້ຮັບກຽດຕ້ອນຮັບພະນະທ່ານ ກອນຣະສິດ ພັກໂຊຕານົນ ປະທານສະພາຜູ້ບໍລິຫານ ຂອງບໍລິສັດການໄຟຟ້າຝ່າຍຜະລິດສາກົນແຫ່ງປະເທດໄທຈຳກັດ ພ້ອມທັງເປັນຜູ້ວ່າການ ການໄຟຟ້າຝ່າຍຜະລິດແຫ່ງປະເທດໄທ ແລະ ຄະນະ 21 ທ່ານ.

ໂຄງການຈະເລີ່ມຜະລິດໄຟຟ້າໃນເດືອນ ມັງກອນ ປີ 2019 ແລະ ກະແສໄຟຟ້າ ປະມານ 95 ສ່ວນຮ້ອຍ ຈະຂາຍສົ່ງໃຫ້ປະເທດໄທ ແລະ ສ່ວນທີ່ເຫຼືອຈະນຳມາຊົມໃຊ້ພາຍໃນປະເທດ.

ໂຄງການຄາດວ່າຈະສ້າງລາຍຮັບໂດຍກົງໃຫ້ແກ່ລັດຖະບານລາວໄດ້ຫຼາຍກວ່າ 600 ລ້ານໂດລາສະຫະລັດ (4.800 ຕື້ກີບ) ພ້ອມທັງຜົນປະ ໂຫຍດທາງອ້ອມຈຳນວນໜຶ່ງອີກໃນໄລຍະສຳປະທານ 27 ປີ ແລະ ຫຼັງຈາກນັ້ນໂຄງການຈະຖືກໂອນມາເປັນກຳມະສິດຂອງລັດຖະບານແຫ່ງ ສປປ ລາວ.