ນັບຕັ້ງແຕ່ປີ 2014 ເຖິງປະຈຸບັນ ໂຄງການເຂື່ອນໄຟຟ້ານໍ້າງຽບ 1 ໄດ້ສະໜອງທຶນການສຶກສາທັງໝົດ 171 ທຶນ ໃນນັ້ນ 111 ທຶນແມ່ນເພື່ອສະໜັບສະໜູນນັກຮຽນຜູ້ທີ່ມີເງື່ອນໄຂໃນເຂດໂຄງການເພື່ອສຶກສາຮຽນຕໍ່ໃນລະດັບວິທະຍາໄລ ແລະ ມະຫາວິທະຍາໄລ ໂດຍມີໄລຍະການສຶກສາຈາກ 3 ຫາ 7 ປີ, ສ່ວນ 30 ທຶນແມ່ນເພື່ອສະໜັບສະໜູນການຝຶກອົບຮົມວິຊາຊີບໄລຍະສັ້ນ.
ໃນປີ 2018 ທາງໂຄງການໄດ້ມອບທຶນການຝຶກອົບຮົມວິຊາຊີບ 30 ທຶນໃຫ້ແກ່ຊຸມຊົນທີ່ຢູ່ໃນເຂດໂຄງການ. ໃນນີ້ 20 ທຶນແມ່ນເພື່ອການຝຶກອົບຮົມຕັດຫຍິບຂັ້ນພື້ນຖານ ທີ່ : ສູນສາທິດຂອງໂຄງການ ທີ່ ບ້ານ ພູໂຮມໄຊ, ເມືອງບໍລິຄັນ, ແຂວງ ບໍລິຄໍາໄຊ ເຊິ່ງໃນບໍ່ດົນມານີ້ກໍໄດ້ສຳເລັດເປັນທີ່ຮຽບຮ້ອຍແລ້ວ. ສ່ວນອີກ 10 ທຶນແມ່ນເພື່ອສະໜັບສະໜູນໄວໜຸ່ມ 4 ຄົນເຂົ້າຮ່ວມຝຶກອົບຮົມຫຼັກສູດຊ່າງໄຟຟ້າ ແລະ ໄວໜຸ່ມ 6 ຄົນເພື່ອຮຽນຊ່າງສ້ອມແປງລົດໃຫຍ່ ທີ່ : ສູນພັດທະນາອາຊີບນາສ້ຽວ, ເມືອງ ນາຊາຍທອງ, ນະຄອນຫຼວງວຽງຈັນ. ປັດຈຸບັນ ການຝຶກອົບຮົມຫຼັກສູດຊ່າງໄຟຟ້າກໍໄດ້ສໍາເລັດແລ້ວ ສ່ວນຫຼັກສູດຊ່າງສ້ອມແປງລົດໃຫຍ່ຈະສຳເລັດໃນເດືອນຕຸລາ ປີ 2018. ພາຍຫຼັງທີ່ຈົບຫຼັກສູດ ຜູ້ເຂົ້າຮ່ວມຈະໄດ້ຮັບໃບປະກາດ ແລະ ສາມາດນໍາໃຊ້ວິຊາທີ່ຕົນຮຽນມາປະກອບຊີບໃນອະນາຄົດ.
ທຶນການສຶກສາຂອງໂຄງການປະກອບມີຄ່າທີ່ພັກອາໄສ, ອັດຕາກິນ, ຄ່າຮຽນ ແລະ ອຸປະການຮຽນ.
