ເພື່ອສົ່ງເສີມອາຊີບເສີມ ແລະ ປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງປະຊາຊົນ ໂຄງການເຂື່ອນໄຟຟ້ານໍ້າງຽບ 1 ໄດ້ຈັດອົບຮົມຝຶກວິຊາຊີບຕັດຫຍິບຂັ້ນພື້ນຖານໃຫ້ແກ່ແມ່ຍິງໃນເຂດໂຄງການທີ່ສູນສາທິດ ບ້ານ ພູໂຮມໄຊ, ໂດຍມີຜູ້ເຂົ້າຮ່ວມທັງຫມົດ 19 ຄົນ ຈາກ 3 ຫມຸ່ບ້ານຄື: ບ້ານ ພູໂຮມໄຊ, ບ້ານ ຫາດຍື້ນ ແລະ ບ້ານ ທ່າເຮືອ ທີ່ເມືອງບໍລິຄັນ ແຂວງ ບໍລິຄຳໄຊ ໂດຍມີວິທະຍາກອນ ຈໍານວນ 3 ທ່ານ ມາຈາກໂຮງຮຽນເຕັກນິກວິຊາຊີບ ບໍລິຄຳໄຊ ເປັນຜູ້ນໍາພາການສິດສອນ. ການຝຶກອົບຮົມໄດ້ດໍາເນີນເປັນເວລາ 11 ວັນເຕັມ ແລະ ປິດລົງໃນເດືອນ 06 ປີ 2018.
ໃນໄລຍະການຝຶກອົບຮົມ ຜູ້ເຂົ້າຮ່ວມໄດ້ຮຽນຮູ້ວິທີຕັດຫຍິບເສື້ອຜ້າ ເປັນຕົ້ນແມ່ນສິ້ນ ແລະ ເສືອ. ພາຍຫລັງທີ່ຈົບຫຼັກສູດດັ່ງກ່າວນີ້ແລ້ວ ຄາດວ່າຜູ້ເຂົ້າຮ່ວມຈະສາມາດນໍາໃຊ້ຄວາມຮູ້ທີ່ຕົນຮຽນມາເຂົ້າໃນການປະກອບອາຊີບເສີມໃນອະນາຄົດ.
