NamNgiep1 Logo

ໂຄງການເຂື່ອນໄຟຟ້ານໍ້າງຽບ 1 ຕ້ອນຮັບປະຊາຊົນທ້ອງຖິ່ນສູ່ບ້ານໃໝ່ທີ່ຫ້ວຍສູບ

DCIM100MEDIADJI_0005.JPG

ຊາວບ້ານຫາດຊາຍຄຳ ຈຳນວນ 24 ຄົວເຮືອນທີ່ເມືອງບໍລິຄັນ ແຂວງບໍລິຄຳໄຊ ສ.ປ.ປ. ລາວ ໄດ້ຍ້າຍມາຢູ່ບ້ານໃໝ່ທີ່ເຂດຍົກຍ້າຍຈັດສັນຫ້ວຍສູບທີ່ໂຄງການເຂື່ອນໄຟຟ້ານໍ້າງຽບ 1 ໄດ້ພັດທະນາຂຶ້ນມາສະເພາະເພື່ອຮອງຮັບປະຊາຊົນທີ່ຜົນກະທົບຈາກໂຄງການ.

ພິທີເປີດບ້ານໃໝ່ ພ້ອມທັງຂົວໂຄງການນໍ້າງຽບ 1 ເຂົ້າສູ່ໝູ່ບ້ານໄດ້ຈັດຂຶ້ນຢ່າງເປັນທາງການໃນວັນທີ 25 ພະຈິກ ທີ່ເມືອງບໍລິຄັນ ແຂວງ ບໍລິຄໍາໄຊ ໂດຍເປັນກຽດເຂົ້າຮ່ວມຂອງພະນະທ່ານ ປອ. ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ, ພະນະທ່ານ ປອ. ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ເຈົ້າແຂວງບໍລິຄຳໄຊ, ທ່ານເຈົ້າ ແຂວງໄຊສົມບູນ ແລະ ພະນັກງານລັດຂັ້ນສູງ, ຕົວແທນຈາກຜູ້ຖືຮຸ້ນ, ບໍລິສັດຮັບເໝົາ ແລະ ອຳນາດການປົກຄອງທ້ອງຖິ່ນ ແລະ ຊາວບ້ານທີ່ຖືກຜົນກະທົບ.

ທ່ານ ໂຢຊີຮິໂຣ ຢາມາບາຢາຊີ (Mr. Yoshihiro Yamabayashi) ອຳນວຍການບໍລິສັດໄຟຟ້ານໍ້າງຽບ 1 ຈຳກັດ ກ່າວວ່າ: ຂ້າພະເຈົ້າຮູ້ສືກເປັນກຽດຢ່າງສູງທີ່ໄດ້ຕ້ອນຮັບຊາວບ້ານຫາດຊາຍຄຳເຂົ້າສູ່ບ້ານໃໝ່ຂອງເຂົາເຈົ້າຢ່າງເປັນທາງການ. ເຮືອນວິນລາໜຶ່ງຊັ້ນ 24 ຫຼັງພາຍໃນບ້ານແມ່ນໝາກຜົນຂອງຂະບວນການປຶກສາຫາລືທີ່ຮອບຄອບ, ຖີ່ຖ້ວນ ແລະ ຍາວນານ ໂດຍການພິຈາລະນາປະເພນີ, ຂະນົບທຳນຽມ ແລະ ຄວາມເຊື່ອຖືຂອງຜູ້ທີ່ຖືກຜົນກະທົບທັງໝົດຈາກໂຄງການ.

ທ່ານ ພອນສີ ຊົ້ງ ນາຍບ້ານຫາດຊາຍຄຳ ກ່າວວ່າ: “ປູ່ຍ່າຕາຍາຍຂອງພວກເຮົາຫຼາຍເຊັ່ນຄົນພາຍໃນບ້ານບໍ່ເຄີຍມີເຮືອນຫຼັງງາມໆ ເຊັ່ນນີ້ຈັກເທື່ອ. ຊາວບ້ານຂອງພວກເຮົາມີຄວາມສຸກຫຼາຍທີ່ໄດ້ຍ້າຍມາຢູ່ເຮືອນຫຼັງໃໝ່ ແລະ ຈະພ້ອມກັນບົວລະບັດ ແລະ ປົກປັກຮັກສາໃຫ້ມັນຢູ່ໃນສະພາບດີສະ
ເໝີ.”

ຄອບຄົວຂອງທ່ານ ຊົ້ງ ແມ່ນໜຶ່ງໃນປະມານ 480 ຄົວເຮືອນທີ່ຖືກຜົນກະທົບຈາກໂຄງການ ເຊິ່ງສ່ວນໃຫຍ່ແມ່ນຄົວເຮືອນຢູ່ໃນສີ່ໝູ່ບ້ານທີ່ເມືອງຮົ່ມ ແຂວງໄຊສົມບູນ ແລະ ຄາດວ່າຫຼາຍຄົວເຮືອນຈະຍ້າຍມາທີ່ເຂດຈັດສັນຫ້ວຍສູບ ສ່ວນຄົວເຮືອນອື່ນໆ ຈະເລືອກເອົາການຊົດເຊີຍທັງໝົດ ແລະ ຍ້າຍໄປບ່ອນອື່ນດ້ວຍຄວາມສະໝັກໃຈ.

ໃນພິທີເປີດບ້ານໃໝ່ ຊາວບ້ານຫາດຊາຍຄຳທີ່ມີປັນຫາດ້ານສາຍຕາກໍຍັງໄດ້ຮັບການດູແລສາຍຕາ ພ້ອມທັງແວ່ນຕາ ແລະ ການດູແລຮັກສາຊ່ອງປາກ ຈາກໂຄງການແວ່ນແກ້ວ ຊຶ່ງແມ່ນໂຄງການທີ່ລິເລີ່ມໂດຍເຈົ້າຍິງມະຫາຈັກກຣີ ສີຣິທອນແຫ່ງລາຊາອະນາຈັກໄທ ໃນປີ 2003 ຊຶ່ງຕໍ່ມາກໍໄດ້ຖືກສ້າງຂຶ້ນໂດຍການສະໜອງທຶນຈາກທະນາຄານແກ້ວແວ່ນຕາ ທີ່ໂຮງໝໍເມດຕາປະຊາຮັກ, ການໄຟຟ້າຝ່າຍຜະລິດແຫ່ງປະເທດໄທ ແລະ ກຸ່ມ ບໍລິສັດ ຫໍແວ່ນ ຈຳກັດ.

ການພັດທະນາບ້ານໃໝ່ທີ່ເຂດຫ້ວຍສູບທີ່ຕັ້ງຢູ່ເມືອງບໍລິຄັນ ແລະ ຢູ່ທາງທິດຕາເວັນຕົກໃກ້ໆ ກັບເຂື່ອນດັດສົມນໍ້າ ໄດ້ເລີ່ມຕົ້ນຂຶ້ນໃນຕົ້ນປີ 2016 ໂດຍບໍລິສັດຮັບເໝົາຂອງລາວທັໝົດ. ນອກຈາກການກໍ່ສ້າງເຮືອນແລ້ວ ການພັດທະນາຍັງປະກອບມີ ການສ້າງທາງທີ່ມີຄວາມຍາວ 3.35 ກິໂລແມັດເຂົ້າຫາໝູ່ບ້ານໃໝ່, ການສ້າງຂົວຂ້າມແມ່ນໍ້າງຽບ, ໂຮງຮຽນອະນຸບານ ພ້ອມທັງຫໍພັກຄູ, ທົ່ງນາທີ່ມີລະບົບຊົນລະປະທານ, ເຂດປູກພືຶດ ແລະ ຕົ້ນໄມ້ໃຫ້ໝາກ ແລະ ໄມ້ກະສິກໍາ ແລະ ເຂດລ້ຽງສັດ.

ນອກຈາກນີ້ ໂຄງການເຂື່ອນໄຟຟ້ານໍ້າງຽບ 1 ກໍໄດ້ເລີ່ມຕົ້ນພັດທະນາເຂດຫ້ວຍສູບຕື່ມອີກເພື່ອຮອງຮັບປະຊາຊົນທີ່ຈະຍົກຍ້າຍມາຈາກເມືອງຮົ່ມທີ່ແຂວງໄຊສົມບູນ ໂດຍຄາດວ່າການກໍ່ສ້າງເຮືອນ ແລະ ສິ່ງອຳນວຍຄວາມສະດວກຕ່າງໆ ຈະໃຫ້ສຳເລັດໃນເດືອນພຶດສະພາ ປີ 2017.

ໂຄງການໄຟຟ້ານ້ຳງຽບ 1 ແມ່ນໂຄງການເຂື່ອນໄຟຟ້າຂະໜາດ 290 ເມກາວັດ ທີ່ພວມດຳເນີນການກໍ່ສ້າງຢູ່ແຂວງບໍລິຄຳໄຊ ແລະ ແຂວງໄຊສົມບູນ ສ.ປ.ປ. ລາວ ໂດຍປະກອບມີການກໍ່ສ້າງເຂື່ອນສອງເຂື່ອນ ແລະ ເຮືອນຈັກຜະລິດໄຟຟ້າສອງເຮືອນທີ່ນໍ້າງຽບ ແຂວງບໍລິຄຳໄຊ.

ນັບຕັ້ງແຕ່ໄດ້ເລີ່ມຕົ້ນການກໍ່ສ້າງໂຄງການໃນທ້າຍປີ 2014 ກໍມີຄວາມຄືບໜ້າດ້ວຍດີ ປະມານ 55 ສ່ວນຮ້ອຍໃນທ້າຍເດືອນ ຕຸລາ 2016. ສ່ວນວຽກງານດ້ານສິ່ງແວດລ້ອມ ແລະ ສັງຄົມຂອງໂຄງການກໍມີຄວາມຄືບໜ້າດ້ວຍດີເຊັ່ນກັນ.

ໂຄງການແມ່ນຢູ່ພາຍໃຕ້ການຄວບຄຸມການກໍ່ສ້າງ ແລະ ດຳເນີນງານຂອງບໍລິສັດໄຟຟ້ານໍ້າງຽບ 1 ຊຶ່ງປະກອບມີສາມຂາຮຸ້ນຄື: ບໍລິສັດ ຄັນໄຊການໄຟຟ້າແຫ່ງປະເທດຍີ່ປຸ່ນ (Kansai Electric Power), ບໍລິສັດການໄຟຟ້າຝ່າຍຜະລິດສາກົນແຫ່ງປະເທດໄທຈຳກັດ (EGATi), ແລະ ລັດວິສາຫະກິດຖືຮຸ້ນລາວ.

ໂຄງການຈະເລີ່ມຜະລິດໄຟຟ້າໃນເດືອນ ມັງກອນ ປີ 2019 ແລະ ກະແສໄຟຟ້າ ປະມານ 95 ສ່ວນຮ້ອຍ ຈະຂາຍສົ່ງໃຫ້ປະເທດໄທ ແລະ ສ່ວນທີ່ເຫຼືອຈະນຳມາຊົມໃຊ້ພາຍໃນປະເທດ.

ໂຄງການຄາດວ່າຈະສ້າງລາຍຮັບໂດຍກົງໃຫ້ແກ່ລັດຖະບານລາວໄດ້ຫຼາຍກວ່າ 600 ລ້ານໂດລາສະຫະລັດ (4.800 ຕື້ກີບ) ພ້ອມທັງຜົນປະໂຫຍດທາງອ້ອມຈຳນວນໜຶ່ງອີກໃນໄລຍະສຳປະທານ 27 ປີ ແລະ ຫຼັງຈາກນັ້ນໂຄງການຈະຖືກໂອນມາເປັນກຳມະສິດຂອງລັດຖະບານແຫ່ງ ສ.ປ.ປ. ລາວ.

-ຈົບ-

 
For more information, please contact

Somsavath Phanthady
Email: somsavath.phanthady@namngiep1.com
Mobile: 020 5505 3077
www.namngiep1.com